في خاطري شي..!

في خاطري اقول
لربما حب القرائه ان كنت امتلك هذا الحب..هو ما جذبني لعالم التدوين او..افتقادنا لثقافة تدوين المذكرات اليوميه او غيرها ..لربما عالم المدونات عزز هذهِ الثقافه بشكل او بأخر..
اعتبر نفسي متابع للمدونات من الطراز الأول ..ومشارك من الطراز الاخير
...
في خاطري اقول
اذا الله كتب لك صلاة "القيام"
اياك ثم اياك...تصلي بجانب احباب الله..وطيور الجنه
بسببهم ..البال سيرحل الى
دوام, دهن السياره,,اروح الحلاق قبل الفطور او بعده!!
خشوعك وروحانياتك ...حتبوووض
......
في خاطري اقول
الاعلان اللي تكرم فيه الاخ عاجل عن حاجة طفله بتبرع للدم
اطلع عليه احدهم ..فعزم للذهاب ..لايعرف التفاصيل قرأ مستشفى الفروانيه "وقضب الوصاه" ..
طبعا الاخ "منجم" مايدري شسالفه اللي يعرفه يبي يسوي خير لوجه الله ..
دخل المستشفى ولف المستشفى لف يستفسر ..مالقى جواب
دخل غرفه الاداره :
-سلام..فيه طفله محتاجه تبرع دم
-ماسمع شتقوول؟؟
-(كرر الجمله)
-طيب اي جناح؟؟
-شدراني! سمعت الخبر وجيت .. طفله واسمها..!
-روح روح جناح الاطفال ..(وياشر بيده ..مع نظرة واحد مندهش ويطالع ربعه)
راح اخينا بالله للاستعلامات ..لقى مصري وواحد شايب
-عندكم طفله كيت وكيت
-(علامات استفهام وتعجب شوي وتطلع اللمبله فوق روسهم) طب خش المكتب واسأل
-اذا دشيت راح اطق اللي بالمكتب..!
-طب اسال جناح الاطفال
-(اللهم اني فاطر)
دش جناح الاطفال الا زحمه ضك مو طبيعي من البشر وخصوصا عند الكاتب ..ويشوف شباك الصيدليه
-الله يجزاك خير بالمستشفى طفله محتاجه تبرع دم ..وين اولي؟؟
-(يلتفت يمين يسار صخه شوي!) روح للمختبر الدور الاول
راح اخينا بالله الدور الاول يشوف المختبر وينه ماكو شي..! ورقه ملزقينها على الباب وبخط من قلم "بق" ضعيييييييف حيل مكتوب عليه مكان المختبر الجديد بطريقه طلاسم من طقة فوق تحت اكسر ايدك اليمين عقبه الشمال لاشفت تواير مجمعه طوفها لين توصل "البرقيه" تقول توصيف مخيم..!
نزل وشافله دكتور داشله غرفه و "تحقطله" ياخي فيه كيت وكيت وين اهف..؟؟
-روح الجابريه(يمسك اوراق ويطلع)
طيب الجابريه عند اي اشاره!!؟
شافله دكتور ثاني ..
-تكفه..وين.؟؟
-مافيش هنا اصلا سحب دم؟؟ روح مستشفى مبارك
(اخينا مايدل شي ..يعتبر (رخمة دلاله) دق سيارته سلف وراح للافنيوو)
..
الزبده بالنسبه لي
نفتقد شي اسمه
"علاقات عامه"
يعني مستشفى بكبره وبعرضه ...مايعطونه الاجابه الشافيه من اول ماسال
(عمي ماعندنا تبرع دم ..روح لبنك الدم)
وخلصت الحدوته...ليش ذل السؤال ..حتى البنغالي ماسلم منه يسال (ماتبقى من بنو بنغال طبعا)
الاخ اللي كان مرتز بمكتب المدير ومعطيها ديرتي ومكسر السبعه وصايرلي رجل مهم ..لارد نفس الاوادم بذوق ولا عطاه معلومه ..
يعني من اهم وظائف الاداره هي العلاقات العامه ابجت هوز العلاقات العامه تقولك ان اول ركن من اركان العلاقات العامه هو:
اعطاء الجماهير اكبر قدر ممكن من المعلومات
"يعني يامستر قوطي اذا ماتعرف شي بس تحب ترتز ..قول ماعرف مع ابتسامه مو صعبه حيل"
....
في خاطري اقول
الف تحيه لطاقم عمل مسلسل
"ظل الياسمين " ... مخرج العمل "احمد المقله" كون له مدرسه خاصه به احسه شاعر وهو يوجه العمل من اختيار زوايا التصوير وخلافه فعلا لقطاته فيها حس..والصلال ابدع
ويارب مهنا يتزوج ياسمين:)
................
في خاطري:
"بريك وبانزين"
:)
لها حكم لقمان وصورة يوسف..ونغمة داوود وعفة مريم..ولي حزن يعقوب ووحشة يونس..وآلام أيوب وحسرة أدم..ولما تلاقينا وجدت بنانها..مخضبة تحكي عصارة عندم..فقلت: خضبت الكف بعدي ..اهكذا يكون جزاء المستهام المتيم؟؟فقالت وابدت في الحشى حرق الجوى..مقالة من في القول لم يتبرم: وعيشك ماهذا خضابا عرفته..فلا تك بالبهتان والزور متهمِ..ولكنني لما رأيتك نائياً وقد كنت لي كفي وزندي ومعصمي..بكيت دما يوم النوى فمسحته..بكفي! فاحمرت بناني من دمي
"ماعرفه بس :بل عليه:)"
...
عيدكم مبارك وتقبل الله طاعتكم
يارب